Lo Boletín Oficial d'Aragón ha publicau hue, 20 d'abril de 2023, la Ortografía de l'aragonés, aprebada lo pasau 3 d'abril en sesión extraordinaria d'o Pleno de l'Academia Aragonesa de la Lengua. Con este historico acuerdo, l'Academia, cumplindo con o que li encomienda la Lei, mete fin a la situación de concurrencia de multiples propuestas ortograficas pa la escritura de l'aragonés.

L'aprebación d'esta normativa ortografica, aguardada muitos anyos per la comunidat lingüistica, ye una fita historica precisa pa poder seguir abanzando en o proceso de normativización y normalización social de l'aragonés.

La Ortografía de l’aragonés ha estau elaborada, a lo largo d'un anyo de treballo, per la Comisión de Grafía de l'Instituto de l’Aragonés. Esta comisión, constituyida con ixa finalidat l'11 d'abril de 2022, ha estau presidida per Ánchel Conte y en fan part los nueu miembros de numero de l'Instituto. A lo largo de 23 sesions de treballo d’a dita comisión y de dos reunions d'o Plenario de l'Instituto, nueu academicos y academicas van acordar los diferents puntos que conforman esta norma ortografica. Pa ixo, la Comisión va partir d'as solucions aportadas per las distintas normas y tradicions graficas existents dica hue, asinas como d'as propuestas presentadas per los propios academicos y academicas.

Aquí pueden descargar-se las disposicions publicadas en o BOA, tanto en aragonés como en castellano.