Bielsa acullirá las I Chornatas de l’Aragonés «Tornar ta Bielsa» es días 16, 17 e 18 d’octubre
L'Academia Aragonesa de la Lengua e lo Centro d’Estudios de Sobrarbe organizan estas primeras chornatas, con a colaboración d’o Concello de Bielsa. La trobata achuntará lo mundo academico e editorial con es parladors dende lo territorio, pa compartir experiencias e reflexionar sobre lo present e lo futuro de l’aragonés.
Lo programa encomenzará lo viernes 16 d’octubre, a las 18:00 horas, en a sala d’a Casa de la Villa, con a proyección d’o documental «21.000 palabras», de Maxi Campo, que ha estato un revulsivo en a val pa renovar l’interés per la luenga e la suya transmisión. Dimpués i habrá un coloquio con o director e Ánchel Lois Saludas, moderato por Chabier Lozano.
Lo sabado 17 concentrará las ponencias e charratas. Andreu Lascorz, president d’o Centro d’Estudios de Sobrarbe, e Juan Pablo Martínez, director de l’Instituto de l’Aragonés, presentarán las chornatas. Contino, l’escritor y investigador Fernando Romanos fará una charrata sobre lo estato actual de l’aragonés.
La sesión de maitins seguirá con un coloquio moderato per o propio Fernando Romanos, en o cual participarán Ángel Luis Villa (Chistau), Marta Marín (Echo), Ánchel Loís Saludas (Espierba), Chuan Carlos Marco (Fonz) y Mario Cosculluela (A Fueva). Es parladors compartirán las suyas experiencias sobre l’uso y la transmisión d’a luenga en es suyos lugars. Las suyas intervencions permitirán de conoixer de primera man las diferents realidaz de l’aragonés en o territorio y es retos que han de concarar las personas que lo mantienen vivo en a vida cotidiana.
La sesión de maitín abordará lo estato actual d’a luenga e las experiencias d’uso en diferents territorios, con especial atención a las voces d’os suyos parladors.
De tardes, lo programa incluyirá una intervención de Juan Pablo Martínez sobre l’Academia Aragonesa de la Lengua e un espacio adedicato a la literatura e la edición en aragonés, con presentacions per parte de Xordica Editorial e Gara d’Edizions e una paradeta de libros en aragonés. Un concierto d’Ensamble en aragonés e una cena, que requiere inscripción previa, rematarán la chornata.
Las personas interesatas ya pueden inscribir-se-ie a través d’o formulario d’inscripción u d’o codigo QR d’o cartel. Las chornatas son ubiertas a toz es que charran, estudian, ensenyan u escriben en aragonés, e a toda persona interesata que quiera acercar-se a la luenga e participar en esta trobata.
