Las I Chornatas de l’Aragonés de Bielsa reúnen a mas de 40 participants y refuerzan lo contacto entre l’Academia y los parladors
La trobada, organizada por lo Centro de Estudios de Sobrarbe y l’Academia Aragonesa de la Lengua, achuntó lo mundo academico y editorial con parladors de diferents territorios. A los mas de 40 participants s’hi sumoron vecins de Bielsa que asistioron a belunas d’as actividaz.
L’Academia Aragonesa de la Lengua fa un balanz muito positivo d’as I Chornatas de l’Aragonés «Tornar ta Bielsa», celebradas los días 16, 17 y 18 d’octubre. La participación, l’intercambio d’experiencias y las charradas entre los asistents permitioron compartir conoiximientos sobre la situación actual de l’aragonés y las posibilidaz de favoreixer lo suyo uso y transmisión. La trobada combinó charradas y mesas redondas con cine, literatura, musica y una visita a lo patrimonio local.
Un d’os aspectos mas destacaus estió lo protagonismo d’os parladors. Dimpués d’a charrada de Fernando Romanos sobre lo estau actual de l’aragonés, lo coloquio con Ángel Luis Villa (Chistau), Marta Marín (Echo), Ánchel Loís Saludas (Espierba), Chuan Carlos Marco (Fonz) y Mario Cosculluela (A Fueva) permitió conoixer de primera man las experiencias d’uso y transmisión d’a luenga en os suyos lugars. Las intervencions amostroron la importancia d’escuitar a qui la emplegan cada día y de conoixer las distintas realidaz d’o territorio.
L’Academia participó en a presentación d’as chornatas a través de Juan Pablo Martínez, director de l’Instituto de l’Aragonés y secretario de l’AAL, que intervinió tamién en a sesión d’a tarde pa dar a conoixer la institución y lo suyo treballo. La trobada permitió reforzar lo contacto con parladors, investigadors y editors, y expresar l’interés de l’Academia en colaborar con as institucions y los centros d’estudios locals que treballan sobre la luenga.
Lo programa cultural contribuyió tamién a la participación d’a población local, que fació que se plenase la sala en beluna d'as actividaz. La prochección d’o documental «21.000 palabras», de Maxi Campo, acercó a los asistents lo treballo de recuperación d’o belsetán d’Ánchel Loís Saludas. La literatura y la edición en aragonés, la mosica y la visita a la ilesia d'Ixabierre de Bielsa completoron una programación que facilitó lo contacto y la convivencia entre los participants.
L'Academia agradeixe lo treballo d’a chunta directiva d'o Centro de Estudios de Sobrarbe, encabezada per lo suyo president, Andreu Lascorz, con una mención especial a José Miguel Cheliz y Chorchi Díaz, responsables d’a organización directa. L'agradeiximiento se fa extensivo a los ponents, que aceptoron participar dende lo primer momento, a los asistents y a los vecins de Bielsa, asinas como a lo Concello de Bielsa y lo Ministerio de Cultura per la suya colaboración y emparo.
Lo buen resultau d’esta primera edición anima a seguir promovendo trobadas en os territorios de parla aragonesa y a dar continuidat a los contactos establius, con nuevas colaboracions pa l’estudio, la difusión y la transmisión d’a luenga.