L'Academia lanza lo primer numero d'a suya revista cientifica: Revista de l'Academia Aragonesa de la Lengua.
L'Academia Aragonesa de la Lengua ha lanzau lo primer volumen d'a suya nueva publicación cientifica, la Revista de l'Academia Aragonesa de la Lengua (RAAL). Esta revista, d'acceso ubierto y revisada per pars, naix con l'obchectivo de promover la investigación y lo debat cientifico sobre l'aragonés y lo catalán en aragón, mirando de fomentar la suya dignificación y normalización. Lo volumen inaugural, ya disponible en linia y dirichiu per Javier Giralt Latorre, reúne un conchunto d'estudios de reconoixius especialistas que abracan disciplinas como la sociolingüistica, la paremiolochía, la dialectolochía, la lexicografía, la toponimia y la fonetica diacronica d'as luengas propias d'Aragón.
Mientres os suyos cuatro anyos d'existencia, l'Academia Aragonesa de la Lengua ha feito diversas actividaz, ha estau present en os medios de comunicación y ha creau un portal web publico, an se puede trobar información sobre la institución, es academicos y las noticias que se cheneran alredol d'ella (https://academiaaragonesadelalengua.org/). Tamién ha encomenzau una linia de publicacions de carácter academico, cientifico y divulgativo con o libro Ortografía de l'aragonés (2023), que replega la que, dende alavez, ye la ortografía oficial y de referencia pa las institucions y usuarios de l'aragonés.
Ara, l’Acadèmia ha volgut donar un pas més en la seua tasca d'estudi i difusió de les llengües pròpies d'Aragó amb la publicació d’aquesta revista científica, com a mitjà útil per a divulgar-ne aspectes lingüístics i literaris que són d’interès, no només per als estudiosos, sinó també per a la societat aragonesa en general.
Agora, l'Academia ha quiesto fer un paso mas en a suya fayena d'estudio y difusión d'as luengas propias d'Aragón con a publicación d'esta revista cientifica, como medio útil pa divulgar-ne aspectos lingüisticos y literarios que son d'interés, no nomás pa es estudiosos, sino tamién pa la sociedat aragonesa en cheneral. Con este primer numero de RAAL s'inaugura una endrecera que permitirá potenciar l'interés y la reflexión alredol de toz ixes aspectos que alcanzan a estas dos luengas. En este sentiu, RAAL quiere convertir-se en un foro de debat an que se planteyen cientificament cuestions de tanta importancia pa lo futuro de l'aragonés y lo catalán en a Comunidat Autonoma d'Aragón, pa la suya dignificación, promoción, revitalización y normalización social.
Portalada d'o primer volumen d'a RAAL
Portal web d'a RAAL
Contenius d'o primer volumen
Lo volumen inaugural, publicau este mes d'octubre y dirichiu per Javier Giralt Latorre, reune un conchunto destacau de estudios sinyaus per especialistas de reconoixiu prestichio. En l'ambito d'a paremiolochía y lo clima, José Enrique Gargallo Gil analisa es refrans meteorolochicos. La sociolingüistica ye present con o treballo de María Dolores Gimeno Puyol sobre l'asociacionismo lingüistico en a Franja. Iraide Ibarretxe-Antuñano aborda es retos y las aportacions d'as luengas d'Aragón a la lingüistica actual. En o campo d'a lexicografía y lo contacto de luengas, Josep Martines Peres investiga un presunto aragonesismo en valenciano. La dialectolochía s'explora en l'articlo de Brian Mott sobre la sintaxi de l'aragonés chistabín. Artur Quintana i Font analisa la luenga d'o escritor Jesús Moncada. Javier Terrado Pablo estudia la transmisión d'a luenga popular per medio d'un inventario medieval. Finalment, lo volumen incluye estudios de toponimia, como lo de Guillermo Tomás Faci alredol d'os nombres de l'Alchafaría medieval, y de fonetica diacronica, con a contribución de Jesús Vázquez Obrador sobre la evolución d'as vocals en aragonés. La imachen de portalada d'este primer numero ha estau cedida per lo filologo y fotografo Chabier Lozano.
Acceso y disponibilidat
La revista, que tendrá una periodicidat anyal, naix con a vocación d'estar un referent academico en l'ambito d'a filolochía aragonesa y catalana. RAAL ye una publicación d'acceso ubierto immediato y seguirá un rigoroso sistema de revisión per pars (peer review), pa garantizar asinas la calidat y lo rigor cientifico d'os articlos que publique. L'Academia convida a tota la comunidat investigadera y a lo publico interesau a consultar y descargar gratuitament este primer numero, que ye a la disposición de toz en o portal de revistes de l’AAL.
Ya se pueden ninviar propuestas d'articlos pa lo siguient volumen a traviés d'a mesma plataforma u de l'adreza electronica d'a revista (revistas@academiaaragonesadelalengua.org).