L'Academia Aragonesa de la Lengua y la Universidat de Zaragoza sinyan un convenio de colaboración pa promocionar las luengas propias d'Aragón

Lo president de l'Academia Aragonesa de la Lengua, Javier Giralt y la rectora d'a Universidat de Zaragoza, Rosa Bolea, han sinyau este mierques en la sala Amar y Borbón d'o Paraninfo un convenio de colaboración entre las dos entidaz.

L'obchectivo d'esta alianza ye la colaboración pa fomentar l'uso, protección y promoción d'as luengas propias d'Aragón (aragonés y catalán). Pa ixo, las dos institucions academicas farán de conchunta actividaz de carácter cultural, educativo, editorial y cientifico, y tendrán acceso reciproco a los fondos bibliograficos y documentals pa lo suyo uso en a creación de corpora y en o desenrollo de tecnolochías de procesamiento d'o luengache natural. 

Amás, l'Academia Aragonesa de la Lengua asesorará a la Universidat de Zaragoza en temas relacionaus con l'uso correcto d'as luengas y modalidaz lingüisticas propias y con a suya promoción social, asinas como en a revisión y traducción d'aquels textos que las dos partes consideren d'interés. Cuan la Universidat de Zaragoza emplegue las luengas propias d'Aragón, seguirá la norma lingüistica establida per l'Academia, cumplindo asinas con lo indicau en a Lei 3/2013 de 9 de mayo, d'uso, protección y promoción d'as luengas y modalidaz lingüisticas propias d'Aragón.