Lo sabado 10 de febrero lo Concello de l'Aínsa organizó un emotivo y multitudinario homenache a Ánchel Conte. Un acto en que l'aragonés tenió un paper central y que contó con a participación de l'Academia Aragonesa de la Lengua.
L'homenache, que s'estendió per mas de 3 horas, estió presidiu per una fotografía d'o propio Ánchel, chunto a la gaita de boto de Bestué que Ánchel aduyó a recuperar y lo suyo propio trache d'o grupo de bailes tradicionals Viello Sobrarbe. L'acto tenió como mayestro de cerimonias a l'editor Chusé Raúl Usón y contó con buena cosa d'intervencions, muitas d'ellas en aragonés, que dibuixoron un hombre excepcional, compromeso, cheneroso y treballador en totas las epocas y en as multiples facetas d'a suya vida. La parola se veyió acompanyada d'a mosica y d'o baile con as actuacions de La Orquestina del Fabirol, Os Chotos y lo grupo Viello Sobrarbe.
La intervención per part de l'Academia Aragonesa de la Lengua corrió a cargo d'o suyo secretario, Juan Pablo Martínez, actual director de l'Instituto de l'Aragonés. Si las intervencions anteriors ya heban ilustrau lo paper d'Ánchel como figura fundacional d'o movimiento de recuperación y defensa de l'aragonés y como referent d'a literatura modera d'esta luenga, lo secretario de l'Academia se centró en l'actividat d'Ánchel Conte como academico, que describió como “lo suyo zaguer servicio” a la cultura aragonesa. En una emotiva intervención, describió lo compromís y la ilusión d'Ánchel con l'Academia (dica lo punto de participar telematicament en sesions d’o Pleno mesmo estando ingresau en l'hespital) y lo suyo treballo terne, como director de l'Instituto de l'Aragonés, per aconseguir que l'aragonés tenese una ortografía normativa oficial.
Ánchel Conte asumió lo cargo, conscient d'a dificultat d'a fayena que se columbraba per debant, pero sabedor de que lo suyo perfil, respetau per toz, podría liderar a lo grupo de personas que constituyiban l'Instituto de l'Aragonés. Lo secretario exalzó lo treballo y determinación d'Ánchel presidindo y moderando, a pesar d'a suya salut, los treballos que levoron ta l'aprebación d'a Ortografía de l'Aragonés en abril de 2023. Lo secretario de l’Academia anunció tamién la publicación d'a Ortografía en formato dichital y impreso, con prologo d'o propio Ánchel Conte, una ortografía que "leva la impronta d’Ánchel, dende la A dica la Z" y que ye "lo colofón d’o extenso legau que Ánchel nos ha deixau a los parladors d’aragonés". Recordó los desveilos que le produciban la falta d’emparo institucional y l’alegría de veyer la buena acullida que la ortografía iba tenendo entre la sociedat civil, asociacions y editorials.
La intervención de Juan Pablo Martínez remató con unas parolas adedicadas a la suya relación personal en este tiempo de treballo conchunto con Ánchel, agradeixendo lo regalo d’haber contau con l’amistat d’a qui describió como "un hombre integro, sensible, carinyoso, impulsivo, con una rasmia y un optimismo infinitos, y un estoicismo admirable debant de l’adversidat".