Muere l'academico Ánchel Conte Cazcarro (1942-2023)
L'academico Ánchel Conte Cazcarro (Alcoleya de Cinca, 1942) ha muerto esta pasada nueit en Almería, a los uitanta y un anyos, dimpués d'un empioramiento d'a suya malotía respiratoria. Esta circumstancia, que ha limitau prou la suya mobilidat en os zaguers meses, no li ha privau de cumplir con ilusión y entusiasmo con as suyas obligacions academicas. Ánchel Conte ha estau miembro d'a institución normativa dende la suya constitución en 2021. Estió eslechiu, per unanimidat, director de l'Instituto de l'Aragonés, y presidió los treballos d'a Comisión de Grafía que levó enta la elaboración y aprebación d'a ortografía normativa de l'aragonés, un treballo d'o cual se sentiba muit argüelloso.
Escritor, historiador y etnografo, Ánchel Conte exerció como catedratico d'instituto dica la suya retreta. Conte yera una voz clau en a literatura moderna en aragonés. Entre la suya producción literaria en aragonés destacan libros de poesía como: No deixez morir a mía voz (1972, reeditada en 1986, 2002 y 2016), O tiempo y os días (1996), E zaga o mar o desierto (2002), Luna que no ye luna (2014) y Digo sinse dicir (2017), y de prosa como: O rafe d’o espiello (1997), O bolito d’as sisellas (2000), De ordo sacerdotalis (2004) y Aguardando lo zierzo (2002, reeditada en 2022). La suya obra s'han traduciu ta lo ruso, castellano, francés, euskera y asturiano, y ha publicau amás poemas y cuentos en revistas y atras obras colectivas. Ha recibido cuantos premios literarios y distincions, entre ellas, la Medalla a lo Merito Cultural d'o Gubierno d'Aragón, en 2009. Ha estau, amás, una figura sinyalera en o movimiento de recuperación de l'aragonés, estando fundador d'entidaz como lo Consello d'a Fabla Aragonesa u la Sociedat de Lingüistica Aragonesa. Ye coautor de El aragonés, identidad y problemática de una lengua (1982). Como historiador, ye autor de libros como La Encomienda del Temple de Huesca, La aljama de moros de Huesca, Los moriscos de la ciudad de Huesca, una convivencia rota; La aljama de moros de Barbastro, Los moros de la comarca de Barbastro y Tierras del Cinca, amás de buena cosa d'articlos y comunicacions, cuasi siempre sobre temas altoaragoneses, en aragonés y castellano.
